Двајца австралиски блогери за патувања кои беа притворени три месеци откако беа уапсени затоа што летаа со дрон во близина на воена зона без дозвола беа ослободени и вратени назад во Австралија.
Иранските власти ги отфрлија обвиненијата против австралиско-британската блогерка Џоли Кинг и нејзиниот вереник Марк Фиркин, тие беа држени во озлогласениот затвор Евин во Техеран од почетокот на јули.
Кинг и Фиркин беа ослободени како дел од можна размена на затвореници, според Асошиетед прес.
Истовремено со ослободувањето на двојката, иранската државна телевизија објави дека Реза Дехбаши, ирански научник кој бил притворен 13 месеци во Австралија поради купување одбранбен систем за неговата земја од САД, се вратил дома.
Иранската телевизија соопшти дека австралиското правосудство планирало да го испрати Дехбаши во САД, но дека тој бил ослободен со дипломатски напори на Техеран.
Кинг и Фиркин и се заблагодарија на австралиската влада и објавија изјава, велејќи: „Исклучително сме среќни и олеснети што безбедно се вративме во Австралија со оние што ги сакаме. Иако изминатите неколку месеци беа многу тешки, знаеме дека беше тешко и за оние дома кои беа загрижени за нас“.